Wie is ons?

Ons het baie lede in een liggaam, en die lede het nie almal dieselfde funksie nie. Net so is ons, al is ons baie, in Christus een liggaam, en almal afsonderlik lede van mekaar. Ons het genadegawes wat van mekaar verskil volgens die genade wat God aan elkeen van ons gegee het. As dit die gawe van profesie is, laat ons dit gebruik in ooreenstemming met die geloof wat ons bely. As dit is om te dien, laat ons dien. As dit is om onderrig te gee, laat ons onderrig gee. As dit is om mense te bemoedig, laat ons hulle bemoedig. As ons gee, laat dit sonder bybedoelings wees. As ons leiding gee, dan met toewyding. As ons ander help, dan met blymoedigheid.
Romeine 12:4-8 (Die Bybel 1983 Vertaling)

Hendrina is geleë op die Hoëveld van Mpumalanga en ons gebied word geken aan ons landbou en mynboubedrywighede. Dit is mielie-, bees-, steenkool- en kragstasie- wêreld. Daarom is ons afhanklik van die landbou- en mynbousektor vir werksgeleenthede.

'n Geloofsfamilie waar ons:

Aanbid

Ons bied verskeie geleenthede waar ons as gemeente in geheel of in kleiner groepe saam aanbid. Ons primêre doel  is om die Lewende Here te aanbid, verheerlik en te dien.  


Eredienste:  

Ons het elke Sondag 'n erediens in die Kerkgebou om 09h00 - saam met die Christendom vier ons weekliks die opstanding van Jesus Christus ons Hoop en Toekoms. Ons Erediens is word ingerig op modelle van die NG Kerk wat Gereformeerd in tradisie is. 

Kategese: 

Ons bied tydens die skoolkwartaal vir ons kinders tussen die onderdom van 2 en 10, Kinderkerk aan in die Kerksaal Sondae om 09h00.  
Kategese vind plaas direk na die erediens ±10h00.  
Sedert 2018 word ons eredienste direk met beeld en klank uitgesaai na die SAVF te huis Hendrina. 


Bybelstudies en kleingroepe: 

Daar is weekliks twee Bybelstudies: 
Boekklub Woensdae om 09h00 aan huis van Anna Bosman o.l.v. Alta Roux. 
Woensdae om 10h00 by die SAVF te huis o.l.v. predikante uit die gemeenskap. 

Elke tweede Donderdagaand is daar 'n kleingroep "Ontdek jou Bybel" by die pastorie om 18h00 o.l.v die leraar.     

Aanbidding vind nie net plaas op Sondae of op die kerkperseël nie, maar waar ons gemeentelede in groepe, gesinne of induvidueel Bybel lees, studie doen en bid - by die huis, die werk, die skool of in die veld. 


Die Kapel:
Ter viering van die 100ste bestaansjaar van die Oukerk of Kerksaal, is daar 'n lokaal ingerig as 'n Kapel.  Die Kapel is gedurende die week oop van 08h00 tot 15h00.  Dit is daar vir as gebedskamer, kleiner intieme gebedsgeleenthede en begrafnisse.  

Waar ons vir mekaar omgee

Ons gemeente vorm 'n liggaam, wat bestaan uit 'n diverse gemeenskap mense, elkeen met unieke gawes en talente waarmee ons die Here, mekaar en die gemeenskap wil dien.  Daarom is elke lid verantwoordbaar vir die gemeente. 

Ons is 'n geloofsfamilie wat vir mekaar wil omgee.  Ons streef daarna om na mekaar om te sien, mekaar te dra en vir mekaar lief te wees.  Ons fokus om almal gasvry te ontvang en 'n gemeenskap te wees wat mekaar en ander insluit.  
Omdat ons streef om inklusief te wees, is almal by ons welkom!


Diensbaar is tot die gemeenskap

Ons is deel van die gemeenskap van Hendrina en daarom is gemeenskaplike bande is vir ons belangrik.  

Ons staan in verhouding met die volgende organisasies en kerke:

Die Gekombineerde Skool Hendrina, wat verantwoordelik is vir die opvoeding van ons kinders.  

Ander gemeentes in ons dorp - hierdie gemeenskaplike verhouding word sigbaar in ons jaarlikse Gemeenskaplike Kerssangdiens, wat jaarliks die eerste naweek van November om 18h30 plaasvind vanuit die NG Kerkgebou.  Hierdie gemeentes is oa. die NHK, GK, AGS en APK van Hendrina.  

Die CMR (Christelike Maatskaplike Raad) van Hendrina wat verantwoordlik is vir die ondersteuning van behoeftige gesinne en persone in ons dorp. 

Die SAVF tehuis Hendrina waar bejaarde persone woonagtig is en ook versorg word.  

Nood verlig

In dankbare navolging van Jesus wil ons, ons beywer vir God se Koninkryk en die opbou en uitbou daarvan in Hendrina. Ons is graag diensbaar in ons gemeenskap.  

Ons gemeente is diep bewus van die opdrag dat ons die Evangelie moet verkondig, en deel daarvan dat ons moet fokus op barmhartigheidswerk.  Daarom is ons en ons lidmate betrokke by verskillende organisasies wat nood aanspreek.  

Ons ondersteun graag gevestigde projekte wat daargestel is om nood te verlig.  

Ons ondersteun konstant die volgende projekte d.m.v. fondse en/of betrokkenheid:
Voedingskema vir kinders by die Gekombineerde Skool Hendrina
CMR Noodvoedingfonds
SAVF
Latchkey Kids SA. voor- en naskoolsentrum vir behoeftige kinders (±70) wat op ons perseel is.   

Ons het jou nodig

Alhoewel fondse altyd benodig word om projekte en organisasies te laat funksioneer, het ons nie net fondse nodig nie, maar hande en voete om die werk te doen.  

Ons het jou hulp nodig!

Jy kan by een van die volgende organisasies betrokke raak:
CMR Hendrina
SAVF tehuis Hendrina
Latchkey Kids SA. naskoolsentrum
Bybelverspreiding

Kontak gerus die kerkkantoor vir meer inligting

Ons gemeente word ook verteenwoordig by:
Taakspan vir kleingemeentes - Oostelike Sinode
CMR - Oos bestuur
CMR - Mpumalanga bestuur

Personeel

Dominee & Voorsitter van die Kerkraad - Tielman Roux

Gemeentebestuurder - Susan Muller

Voorsitter Finansies - Heleen Nieman

Voorsitter Eiendomme - E.P. Steyn

Voorsitter Ouderlingesorg - Willie Jacobs

Voorsitter Diakonie - Sakkie Kotzé

Voorsitter Vroudiens en Gasvryheid - Ansi Coetzee

Geboue

Ons terrein het drie groot geboue nl. die Kerk, die Kerksaal en die Basaarsaal. 
Die Kerkgebou word slegs gebruik vir eredienste, begrafnisse en troues. 
Die Kerksaal (volledig toegerus) en Basaarsaal is te huur vir privaatfunkies.
Vir meer besonderhede kontak gerus die kantoor.

Gedenkmuur

Ons gemeente beskik oor 'n gedenkmuur waar die as van geliefdes geplaas kan word. Enkel en dubbel nissies kan gekoop word wat 'n granietteël insluit. Vir pryse, meer inligting en vorms skakel gerus die kantoor.